Канон преподобным Антонию и Феодосию Печерским
Тропарь
глас 4-й
Звезды мысленныя, просиявшия на тверди Церковней, иноков Российских основание, песньми, людие, почтем, радостныя похвалы сим воздающе, радуйтеся, преблаженнии отцы, Антоние со Феодосием Богомудрим, присно молящиися о возследствующих и чтущих память вашу.
Ин Тропарь, глас 3-й
Двоицу начальных Российских светил почтим, Антония, Богом посланнаго, и Феодосия, Богом дарованнаго: тии бо первии, равноангельным в России житием просиявше от гор Киевских, осветиша отечествия нашего вся концы, и путь к Небеси правый многим показаша, и, первоотцы иноком бывше, лики спасаемых Богови приведоша, и ныне, предстояще в вышних немерцаемому Божества Свету, молятся о душах наших.
Канон
глас 4-й
Песнь 1
Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся Тоя чудеса.
Припев: Преподобнии отцы наши Антоние и Феодосие, молите Бога о нас.
Яко грубословен и косноязычен, недоумея вам, преподобнии отцы, хваление принести, молюся, дарствуйте молитву о мне: еже датися отсвышше дару воспети память вашу, славна бо есть миру, и славно прославися.
Преподобнии отцы наши Антоние и Феодосие, молите Бога о нас.
От младих ногтий в дар принесосте себе Богови, о преблаженнии отцы: тем же прием ваше благое предприятие, благодатию Духа наставил вы есть на путь правый.
Преподобнии отцы наши Антоние и Феодосие, молите Бога о нас.
Заповедей спасенных послушавше, жизнь временную преобидесте, и Крест Господень на рамо вземше, мрачный мир непреткновенно прейдосте, небесным желанием водими.
Преподобнии отцы наши Антоние и Феодосие, молите Бога о нас.
Отечество, родители, други и богатство, аки прелесть отвергше, Горний Иерусалим Бога же Отца, не стыдящагося вас братию нарицати, Христа, един бисер взыскати тесным путем изволисте, Антоние свободоимените, и Феодосие Богодарованне.
Преподобнии отцы наши Антоние и Феодосие, молите Бога о нас.
Яко пустыннолюбныя горлицы гор Печерских достигше Богоноснии отцы, во подземная места вселистеся, и на твердом духовнаго желания основании гнездо свое положше, Богопеснивия породисте птенцы, иночествующих лики.
Слава: Слава Ти, слава, Троице Пресвятая, тихообразно подающая благодать в сердца верных, да скончаем хваления святых дело, и возвеселимся зело, честныя други Твоя, Господи.
И ныне: Управи ум мой, Пречистая, во хвалении преподобных Твоих, да, не уклонся в неподобная сложивия пленится в работу лукавства: и буду радование чуждему.
Песнь 3
Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.
Преподобнии отцы наши Антоние и Феодосие, молите Бога о нас.
Яко елень возжаждав духовнаго пития, отче Антоние, от Печерския горы на Афонскую Гору скача пришед, обрете струя Ангеловидных отец жития, и сим поревновав от потока учения их испив и утвердися.
Преподобнии отцы наши Антоние и Феодосие, молите Бога о нас.
Втораго тя Моисея, Антоние, скрижали добродетелей на Печерскую гору принесшаго, слышав, Феодосии притек, глаголя: вчини мя в сих любовь, утверди мя в них, аки в Мирех, уязвен бо есмь любовию сопоследовати Христоподражанному житию твоему.
Преподобнии отцы наши Антоние и Феодосие, молите Бога о нас.
Любовию и желанием ко Богу единоумне сопрягшеся, отцы преподобнии, на колесницу смирения, нищеты, терпения и чистоты вседосте, и превысоких достигосте святых селений.
Преподобнии отцы наши Антоние и Феодосие, молите Бога о нас.
Кто не удивится вашему житию, о преблаженнии отцы: кто не почудится ревности по Бозе, яко во плоти суще, Ангелом весьма уподобистеся, их же и сожители суще ныне, не забудите и нас, песньми вас ублажающих.
Слава: Непостижимая благость и действо Твое, во Троице Единый Боже: яко бренных воскрыляеши горе, и от миродержавныя нощи выспре ко свету возвышаеши, приводиши и устрояеши, Бог бо еси и твориши, елика хощеши.
И ныне: По величию Твоему, Пречистая, блажат Тя вси роди, и мы с ними блажим песньми, чтуще Тя раболепным поклонением, и величаем.
Господи, помилуй (трижды).
Седален
глас 4-й
Небесное богатство и присносущную славу тщащеся восприяти, нищету и смирение, смирившагося Владыки восприясте, и миру себе распясте со похотьми и страстьми, тем блажаще память вашу, преподобнии отцы наши Антоние и Феодосие, молим, молите Христа Бога, даровати нам велию милость.
Слава, и ныне: Небесных и земных Царица сущи, не забуди нищих нас рабов Твоих, но яко Всемогущая, от Своих сокровищ подаждь милостию прощение грехом нашим: яко Человеколюбивая Человеколюбца Мати.
Песнь 4
Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.
Преподобнии отцы наши Антоние и Феодосие, молите Бога о нас.
Самовластная ума, отче Антоние, оставль, под иго Владычне наклонился еси, Емуже и доблественный Феодосий припрягся, пленистеся в послушание Христово, и бысте добрии делателие, единонравны сердцем и духом.
Преподобнии отцы наши Антоние и Феодосие, молите Бога о нас.
Не устрашиша вас в темных пещерах демонская страхования, доблемудрнии воины преподобнии отцы, но падеся ратуяй вас под ногами вашими, низвержен оружием теплыя ко Богу молитвы.
Преподобнии отцы наши Антоние и Феодосие, молите Бога о нас.
Твердое ваше и жестокое житие видев, Всеблагий Бог от темных мест просвети вас дарованием чудес, и славны сотвори миру, ихже недостоин бе мир, в rораx и вертепах крыющихся толиких светил.
Преподобнии отцы наши Антоние и Феодосие, молите Бога о нас.
Яко пресветлая светила постави вас Бог, преподобнии отцы, на свещницы с под спуда, и просветисте жития добродетельми иночествующих лики, иже собрани добре пожиша вашим наставлением.
Слава: Царю царем Всемогущая Троице, брения немощию обложенным нам, рабом Твоим, даждь благодать, ясно пети память преподобных Твоих, в нихже удивил еси вся хотения Своя, Боже.
И ныне: Всесильная Владычице, нас, немощных, препояши силою на сопротивных: подая немощней плоти крепость: о Тебе бо и немощнии крепкия враги побеждают, и победительная в песнех дароносят.
Песнь 5
Ирмос: Ужасошася всяческая о Божественней славе Твоей: Ты бо Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.
Преподобнии отцы наши Антоние и Феодосие, молите Бога о нас.
Учением и творением бысте образ иночествующим, отцы треблаженнии, и вашим наставлением мнози успеша в заповеди Господни, и сих исполнением ко горнему шествию благий путь улучиша.
Преподобнии отцы наши Антоние и Феодосие, молите Бога о нас.
Пророческим сподобльшеся даром, достохвальнии отцы: ов бо огнь указательний на место с небеси упасти сотвори, ов же скудную житницу молитвою муки исполни, от тех даров крупицами насыти души наши, молимся.
Преподобнии отцы наши Антоние и Феодосие, молите Бога о нас.
Яко законодавцы постническим ликом предтекосте: ты, отче Антоние, скрижали деяния и видения силе предлагая, Богоданный же Феодосий, жезлом правления море страстей присек, предхождение тем показуя во Обетованную Землю.
Преподобнии отцы наши Антоние и Феодосие, молите Бога о нас.
Упованием будущих благ себе вооруживше, и Креста меч в руках имуще, победисте мысленнаго Амалика, и наша враги сопособисте победити, яко предводителей наших, молим вы отцы преподобнии.
Слава: Миродательная Троице Единочестный Боже, мир огради, православныя люди, предстоящия в честном храме преподобных Твоих, храм себе сотворяя сердца, приносящих Ти песнь хваления.
И ныне: Мироположнице и скиние Пресвятая Бога Слова, нам слово даждь и мысль управи, во еже пети Тя, яко Благую Благому Родительницу.
Песнь 6
Ирмос: Божественное сие и всечестное совершающе празднество, Богомудрии, Богоматере, приидите руками восплещим, от Нея рождшагося Бога славим.
Преподобнии отцы наши Антоние и Феодосие, молите Бога о нас.
Вышше естества человеческаго подвигшеся, преподобнии: уподобистеся безплотних чином, тем же и почесть сих улучисте, сея Богодарованныя вам благодати и нас, чада ваша, не лишите ходатайством своим ко Богу, молимся.
Преподобнии отцы наши Антоние и Феодосие, молите Бога о нас.
Вам, аки неусыпным стражем, Дева и Богомати ввери дом Свой, егоже пасосте, от волков мысленных стрегуще, и в нем собраннаго вами стада, о преблаженнии.
Преподобнии отцы наши Антоние и Феодосие, молите Бога о нас.
Всегдашним яже ко Богу ума воскрилием, и воздеянием рук преподобнии отцы ставше, Духу Пресвятому селение себе сотвористе, тем же вас аки дом Божий преукрашен хвалами украшаем.
Преподобнии отцы наши Антоние и Феодосие, молите Бога о нас.
Сия еста преудобренная отцы, аки Херувими осеняющии дом Богоматере, и аки премудрыи вожди иноческому лику, ихже не удалитеся заступати во всяких нуждах и скорбех.
Слава: Троице Пресвятая, желательное достояние давшая во скиниях святых Богоносным первоначальникам нашим, сих ради и нас того сподоби, в жизни сей сохраняющи от языческих нахождений.
И ныне: Тя Заступницу мира и Богоматерь всего живота моего, и спасение предлагаю, Ты бо Бога рождши спасти можеши поющия Тя, и в заступление крова Твоего прибегающих.
Господи, помилуй (трижды). Слава, и ныне
Кондак
глас 8-й
Двоицу великих отец и правило иноков светлое, умныя зари онебесившии Российскую Церковь кто по достоянию хвалами воспоет, тии бо Престолу Божию предстоят: но яко имущии дерзновение к Святей Троице, Антоние преблаженне и Феодосие приснопамятне, молитеся о молебная к вам приносящих, и любовию песньми вас ублажающих.
Икос
В присносущнем Пресвятыя Троицы Божественном свете да восприимете селение, преподобнии отцы, вся лета жизни сея в тесной пещере пожисте: тем же и преставльшеся от временних великим чудес дарованием от Господа сподобистеся, болезные исцеляти, беси от человек прогоняти, и без вреда обитель свою сохраняти, заступающе во скорбех, и молитися о молебная к вам приносящих, и песньми любовию вас ублажающих.
Песнь 7
Ирмос: Не послужиша твари Богомудрии паче Создавшаго, но огненное прещение мужески поправше, радовахуся, поюще: препетый отцев Господь и Бог, благословен еси.
Преподобнии отцы наши Антоние и Феодосие, молите Бога о нас.
Благую жизнь зде поживше, блаженныя кончины сподобистеся, отцы святии, престависте бо ся от временных ко вечным, честною смертию, яже бывает честна преподобних Твоих, Господи Боже отец наших.
Преподобнии отцы наши Антоние и Феодосие, молите Бога о нас.
Равными труды ниву душ ваших возделавше, преподобнии, равная семена добродетелей посеясте, и по кончине равних воздаяний пожинаете радостотворныя рукояти поюще: Господи Боже отец наших.
Преподобнии отцы наши Антоние и Феодосие, молите Бога о нас.
На воде покойне при источнице вод пресладких, на ложах преподобних упокояющеся, преблаженнии отцы, от потока сладостнаго, поне каплею вашея благодати, чада ваша обдарствите поющия, в день памяти вашея.
Слава: Тройческое нераздельно, раздельне же Лицы, обаче Едино чтем Божество, Безначальна Отца, Собезначальна Сына, и Преблагословеннаго от Отца исходящаго Духа.
И ныне: По Божественному существу Отцу Своему Единосущественный Бог Слово, от Девы единоестествен человеком явися, плоть прием из пречестних кровей, и Благословенную нарек Свою Матерь.
Песнь 8
Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.
Преподобнии отцы наши Антоние и Феодосие, молите Бога о нас.
Гради и отечества своя яко же Авраам остависте, Вышняго Града со Авраамом жителие ныне, Богоноснии отцы, суще, оттуда посетите нас в день памяти вашея, и умолите, Христа с вами нам пети во веки.
Преподобнии отцы наши Антоние и Феодосие, молите Бога о нас.
Иже ваше торжество празднующим днесь, о святии угодницы, молитеся избавитися всякаго вражия навета, от варварских нахождений, и на сопротивных возвышающе рог христиан православных, поющих Господа во веки.
Преподобнии отцы наши Антоние и Феодосие, молите Бога о нас.
Милостивно о нас простирайте руце свои ко Владыце, святии первоначальницы наши, и неотлучно назирайте стадо ваше, яко же обещастеся, сохраняюще то от волков мысленных, сподобите же с вами пети Господа во веки.
Преподобнии отцы наши Антоние и Феодосие, молите Бога о нас.
Славити вашу память кто не восхощет, той ни да улучит вечныя славы, нам же славящим умолите Господа, идеже лики святих, идеже собор преподобних со Ангели, песньми превозносим Господа во веки.
Слава: Яко на превознесенную возшедше гору, приидите, людие, станем во храме преподобных первоначальников Печерских, и прославим Троицу Пресвятую, яже нас собра во днешний день, прославити память святых Своих.
И ныне: Святую гору Божию и селение Вышняго мудрствующе Тя, Дево Чистая, зовем: слава Ти, матерем и девам Славо, и Похвало человеческаго рода.
Песнь 9
Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная, Богородице, Чистая Приснодево.
Преподобнии отцы наши Антоние и Феодосие, молите Бога о нас.
Иже верою приходящим ко храму вашему, святии отцы, утешение подавайте во скорбех, сохраняюще сих различных озлоблений, яко да вас заступников наших присно величаем.
Преподобнии отцы наши Антоние и Феодосие, молите Бога о нас.
Аки десятострунная гусль, и велегласная труба, Печерская, вами согражденная Лавра проповедует вашу память, Антоние Богомудре и Феодосие достохвальне, созывающи люди на хвалу и почесть, ихже и мы величаем.
Преподобнии отцы наши Антоние и Феодосие, молите Бога о нас.
Принесенное в дар благодарственное наше пение, назрете, преподобнии отцы, и тихосмотрительним оком, иже грубогранесловное исправите приемлюще, не яко в дар: но яко во сердец наших к вам рачение, им же вас днесь величаем.
Преподобнии отцы наши Антоние и Феодосие, молите Бога о нас.
Владычней подобящеся благости, аки две лепте пение и делание сие от нас приемше треблаженнии отцы, испросите грехом оставление, в час же конечный предстаните нам, обнадеждующе упованием дойти, идеже святые Христа Царя величают.
Слава: Елико духовную благодать Пресвятаго Духа во грубий разум, толико воспети дерзнух память вашу, Антоние святе и Феодосие блаженне, сим навершающи: дающему молитву молящемуся, и пение хотящему, Богу Единому слава буди, буди.
И ныне: Хотением смотрения Своего вся сотворивый, Пречистая, из Тебе воплотивыйся Бог Истинный, и Человек Совершенный.
|
